पुणे : महापालिकेच्या स्थायी समितीच्या अध्यक्षपदी भारतीय जनता पक्षाचे मुरलीधर मोहोळ यांची बुधवारी निवड झाली. राष्ट्रवादी कॉंग्रेस आणि कॉंग्रेसच्या उमेदवार रेखा टिंगरे यांनी ऐनवेळी आपला उमेदवारी अर्ज माघारी घेतल्याने मोहोळ यांची बिनविरोध निवड झाले.याची घोषणा पिठासन अधिकारी आणि अपंग कल्याण आयुक्त नितीन पाटील यांनी केली.
सकाळी साडे अकरा वाजता महापालिकेच्या श्री छत्रपती शिवाजी महाराज सभागृहात पिठासन अधिकारी नितीन पाटील यांच्या अध्यक्षतेखाली या निवडणूकीस सुरूवात झाली. त्यानंतर अर्ज माघारी घेण्यास १५ मिनिटांची मुदत देण्यात आली त्या मुदतीत रेखा टिंगरे यांनी आपला अर्ज माघारी घेतला. त्यानंतर पाटील यांनी मोहोळ यांची बिनविरोध निवड झाल्याची घोषणा केली.
महापालिकेत एकहाती सत्ता आल्यानंतर महापौर, उपमहापौर, स्थायी समिती अध्यक्ष तसेच इतर सर्व विषय समित्यांची अध्यक्षपदे भारतीय जनता पक्षाकडे राहणार आहेत. त्यानुसार, एकूण 16 सदस्य असलेल्या स्थायी समितीमध्ये भारतीय जनता पक्षाचे दहा तर राष्ट्रवादी कॉंग्रेसचे चार सदस्य असणार आहेत. या शिवाय कॉंग्रेस-शिवसेनेचा प्रत्येकी एक सदस्य असणार आहे.